على ورق أبيض

"كن فى الدنيا كأنك غريب أو عابر سبيل"

من أكتر الجمل اللى بحبها ل"على ابن أبى طالب" مش عارفة بحسها جملة رومانتيكية كده وبحسها عاقلة أوى .

من المفترض إن الجماعة الإسلاميين بيفسروا الجملة دى على أساس إنها دعوة للزهد فى الدنيا وترك الحاجات الحلوة والبعد عن الدنيويات بشكل عام .. وان الواحد يعيش فى حالة تقشف دائم وحالة غربة دائمة من منطلق ان الدنيا هى دار غربة وان الآخرة هى اللى هتبقى بيته بجد وانه هيلاقى ملاذه فى الآخره

يعنى من الآخر بيخلوه يتخلى عن المعلوم ألا وهو " الحياة" فى مقابل انتظار المجهول اللى هو ميعرفش عنه حاجة ومش بيسمع عنه غير حواديت

*************

معتقدش أبدا ان على كان يقصد كده بجملته دى ..... على اللى هو الشخص المتنور فى فى عصر صدر الإسلام ... اللى هو كان عنده علم كتير وكان شخص رغم اعتراضى على حاجات فيه بس كان مختلف عن التانيين ... وأعتقد ان على كان أكثر الناس فى الوقت ده تشغيلا لدماغه

أعتقد ان اللى كان يقصده من الجملة دى هو دعوة للمعرفة يعنى الغريب بطبعه عنده حب استطلاع تجاه الآخر اللى هو عايش معاه وبيحاول يستفيد منه بقدر الإمكان يمكن مش بيحاول يدخل عالمه اوى وبيبص من بره عشان كده بيسموه غريب ... انا معرفش على وهو بيقول الجملة دى كان يقصد ايه أو كان ايه الموقف تحديدا بس لو كان يقصد اللى انا بقوله ده يبقى دى من أجمل دعوات المعرفة اللى اتقالت فعلا

جملة بسيطة جدا وقصيرة جدا بس هى فى مجملها دعوة للعلم والمعرفة وإعمال العقل فى كل حاجة زى ما الغريب بيتعامل فى بلد غير بلده .. بيبقى مجبر إنه يبقى عنده حب استطلاع كبير عشان يتأقلم مع الوسط اللى عايش فيه والا هيموت لوحده وبيبقى مجبر انه يشغل عقله عشان يفهم اللغة أو المنطق اللى بيتكلمو بيه .. ومحدش قال هنا إنه لازم يبقى واحد منهم ويبقى معتقد بكل اعتقادات الوسط ده بل بالعكس .. الجمله دى بتقول ان الواحد يبقى فى حالة غربة دائمة يعنى معرفة أكتر وعلم أكتر

وخلى الإسلاميين يتفرجو بقى

بمر بحالا مزاجيه غريبة جدا الأيام دى وكلها حالات مش شبه بعضها يعنى مثلا قلق من المستقبل ..ملل .. انك واحشنى اوى.. وحاجات كتير شبه دى وكلها بتودينى فى الأخر لحالة من الكآبة. امبارح مرت عليا حالة عمرها ما مرت عليا قبل كده تقريبا وبالعكس حطتنى فى حالة فرحة غريبة أنا مش عارفة أسميها ايه بصراحة بس ممكن نقول هى حاجة شبه الحلم كده.. فى مرة حلمت انى خنتك وفى الحلم كنت مبسوطة اوى وقمت من الحلم حاسة بذنب فظيع انى كنت مبسوطة كده... أنا عمرى ما حلمت حلم وكنت مبسوطة كده .وكنت قلتلك انى حلمت انى بخونك مع نفس الشخص بس المرة دى كان كابوس وده أوحش كابوس تقريبا حلمته فى حياتى... المرة دى بقى كان بجد بس انا تماديت فى الدور وقررت إنى أعيش كل لحظة فيها

أنا ميتة على روحى من الضحك ... أنا نفسى مش فاهمة ليه الشخص ده بالذات بس هى بتيجى كده والله

كان عندى حالة ملل رهيبة ومش لاقية حاجة أعملها قعدت أفكر اعمل ايه ... قلت أكلم الشخص ده لقيته فى ساعتها قام مكلمنى هو انا استغربت أوى مع ان علاقتى بيه مش قوية بس فرحت موووووووت ان هو كلمنى قعدت أرغى معاه شوية وقعدت أسمع مزيكا كتير وبعدين لقيت نفسى منتشية جدا ومش فاهمة ليه وفضلت ماشية وانا منتشية جدا ومزاجى حلو اوى وبرضه مش فاهمة ليه!!!! المهم كعادتى الرخمة إنى بحب أفسر كل حاجة ولازم ألاقيلها سبب علمى قلت يبقى خلاص الشخص ده هو السبب فى الفرحة دى... وقعدت أقنع نفسى انه السبب لحد ما خلاص بدأت متأكدة انه هو السبب ومفيش حاجة تانية وبعدين شوية وقعدت أفلسف الموضوع أكتر وأقول طب ليه هو السبب يعنى؟؟

مهو أصلا مكنتش عاوزة أكلمه ولا حاجة وعادى جدا لو مكانش اتصل بيا كنت مش هاخد بالى أصلا من الموبايل .... وبعدين دماغى اللى مش بتبطل لف وصلت لحل وسط وظريف جدا ايه هو بقى؟؟؟؟؟

إنى بحب الشخص ده وانى حاليا بعيش نزوة !!!!!

وبعدين افتكرتك حسيت بالذنب وافتكرت انك واحشنى أوى وبعدين قلت هحس بالذنب ليه (ايه الهبل ده) هو أنا أصلا عملت حاجة عشان أحس عشانها بالذنب ولا عشان أحس إنى خنتك؟؟؟

أنا بلعب مش أكتر عشان الملل بس وساعتها بقى قررت ان مفيش حاجة هتعكر عليا اللحظة اللى انا بعيشها دلوقتى.. قمت قعدت أرقص وأغنى وأعمل حاجات غريبة بقالى كتير معملتهاش وعشت اللحظة بكل تفاصيلها وقعدت بقى وقتها أستعيد الوقت اللى عرفتك انت فيه وكنت فرحانة فرحة انت مش متخيلها ودماغى بقى راحت لأبعد من كده وعملت شبه العيال الصغيرين وقلت هو دلوقتى هييجى يقولى انا بحبك ومش عارف ايه وانى هفرح جدا( طبعا لو ده بجد هديه فوق دماغه بالجزمة:-( ) وقعدت بقى أحلم بحاجات غريبة وأتخيل حاجات غريبة جدا

رسمت فيلم عربى يعنى مع الشخص ده... فضلت تايهه كده وبحلم الحلم العبيط ده وبعدين قعدت أفكر انك لو مريت بالتجربة دى ومحكتليش هضايق جدا وهغير مووووت قعدت بقى أفكر فى انى أد ايه أنانية وان (ن) قالتلى ان المفروض الواحد فينا لما يكون فى علاقة من الطبيعى انه يمر بتجارب من دى بس برضه وانا فى الحلم ده مكنت متقبلة الموضوع خالص مش عارفة ليه بس برضه حدفت دماغى يمين وشمال وتفيت 3 مرات على الجنب الشمال عشان أطرد الشيطان اللى بيبعدنى عن الجمال اللى كنت عايشة فيه.... هى الصورة كانت مشوشة بس هو كان ميكس بين حكايتنا وبين الوهم اللى انا عشته كان حاجة جميلة فعلا... فجأة!!!!

لقيت إلهام مدفعى طالع بيقولى كقطرة المطر كنت وحيدا

ورجعت زى الأول !!!!!! --

توعدنى بفرحت واستنى بضحكتى زى الوردة ما تبقى مستنية الندى

وتغيب وتفتكر وتجينى وتعتذر فين القلب اللى يقدر يستحمل كل ده

وارجع تانى واقولك ريحنى الله يخليك عشان المركب تقدر تمشى بيا وبيك

خلى شوية عليا وخلى شوية عليك

واضح ان الحالة جت

الناس نامت وانا المفروض أذاكر عشان عندى امتحان بعد بكرة بس مش قادرة أقاوم سحر المزيكا

أحلى أيام بتمر عليا فى السنة كلها بتبقى أيام الامتحانات ببقى فى أقصى حالاتى جنانا

فعلا الممنوع مرغوب فى كل حاجة يعنى فى حاجات مش بحبها أصلا أو هى عادى بالنسبة لى بحب أعملها جدا ليلة الامتحان تحديدا وأبقى مستمتعة متعة مش طبيعية

زى مثلا الزغاريط انا مش بعرف أزغرط ومش بحب أزغرط أيام الامتحانات بقى مش بحس انى بمتحن غير لما اقعد أزغرط من غير سبب كده بعرف ان الامتحانات بدأت وانى لازم أتلم عشان أذاكر

ده غير طبعا القراية اللى مش بتحلى غير فى الأيام دى وغير السرحان الكتير

يااااه على السرحان ومتعته بتطير مع أى نسمة هوا معدية فعلا بتتلكك عشان تهرب من المذاكرة وأى حاجة صغيرة تحصل بتعمل منها موضوع كبييييييييير جدا وحدوتة كبيرة عشان تسرح معاها وتسافر بلاد وتروح أماكن غريبة وفى كل ده متعة ملهاش حدود وبيبقى نفسك فعلا كل ده يحصل حالا وبتكتشف ان خيالك واسع جدا وانت مكنتش تعرف كده وبتفضل ماشى ماشى ماشى لحد ما عنيك تقع فجأة على الساعة تلاقى الوقت اتأخر وانك عندك امتحان بكرة ولسه مخلصتش ربع المادة اللى اول مرة تفتحها فللأسف بترجع نفسك وتقول هأجل ده لبكرة بس بييجى بكرة بأحلام وخيالات جديدة خالص

أحيانا بأجى أقلب فى الكتب بتاعتى بعد ما اخلص امتحانات بستغرب جدا من شكل الكتاب بلاقى الكتاب متلخبط ومتشخبط فيه ومكتوب فيه جوابات حب ومقاطع شعر وأسماء ناس وأرقام تليفونات وأغانى كتير وبلاقى كمان مرسوم أشكال محددة كده وكتيرة جدا لازم فى كل صفحة تكون الأشكال دى مرسومة وكتير بكتشف ان البارانويا كانت واخدانى اوى وانى كاتبه اسمى فى كل صفحة فى الكتاب وانه مثلا مكتوب على الغلاف أكتر من مرة

لا وأحيانا كتير بلاقى شتايم باجى أبص على الفقرة ألاقيها فعلا تستحق الشتيمة

فعلا مش بفتكر انا كتبت ده امتى او عملت اللخبطة دى كلها فى الكتاب امتى بس بفرح جدا انى كنت مبسوطة وانى كنت سرحانة كده لانى عارفة انى لما بسرح وبتوه عن العالم زى ما انا دلوقتى كده ببقى مبسوطة جدا

الحالة الأجمل بقى أيام الامتحانات بتبقى حالة التوحد مع نفسى ببقى مش محتاجة أى حاجة غير مزيكا أسمعها واعيش مع نفسى ومش محتاجة أى حد أكلمه مش بيبقى عندى رغبة خالص انى اتكلم مع حد بس فى نفس الوقت بيبقى عندى رغبة رهيبة انى اقعد اكلم نفسى ال24 ساعة فى اليوم مش ببطل كلام مع نفسى لدرجة ان اصحابى بقو متأكدين خلاص انى مجنونة

بس أنا اكتشفت انى مش بعرف أحكى لأى حد أى حاجة عن نفسى وانى بعرف أحكى كويس اوى عن الحاجات الملموسة انما اللى جوا دماغى بحس انه بينى وبين نفسى بس لأنى بتعامل مع نفسى على انها شخص تانى أصلا وبقعد أعمل حوارات بينا وبرتاح جدا لما أتلكم معاها وهى كمان بترتاح جدا معايا هى بتقولى كده واللى مطمنى فى الموضوع ده انى بحس ان الشخصين اللى هما انا ونفسى مختلفين جدا مع بعض بس فى نفس الوقت هما الاتنين بس اللى بيفهمو بعض

حلو الموضوع ده هو طبعا فصام بس مريح جدا وبيبسطنى جدا وده المهم

فى حاجات كتير وتفاصيل كتير بعملها فى حياتى بتلقائية شديدة وهى بتبقى زى روتين يومى فطبيعى انى متعودة عليه ومش واخدة بالى منه هى بتبقى حاجات لا بتبسطنى ولا بتزعلنى

أيام الامتحانات بقى بكون مركزة جدا فيها وأحب أقطع وقت المذاكرة واعملها وبكون مبسوطة موت انى مضحية بالمذاكرة مقابل انى أعملها واتبسط وياريت لو اعملها فى السر او أقعد أبرر كتير انى هعمل كده مع انى فى الايام العادية بتصرف كده أصلا

فعلا تغور المذاكرة قصاد أى حاجة من دى ... الواحد مش بيحس بالاحاسيس المتلخبطة كده كتير بيتهيألى مينفعش أفوت اللحظات دى

عشان كده بطلع بمواد كل سنة :-(

يلا كفاية تهييس كده بقى وأروح أشوف حالى ولا اهيس شوية فى الورق

أخيرا رجعت البيت بعد غيبة طويل وحشنى أوى الكمبيوتر بتاعى أكيد أول حاجة هعملها انى هفتحه وأقعد أسمع مزيكا

طول الطريق وانا بفكر ازاى هحتفل بالمناسبة دى حاسة انه حدث مهم جدا .. عايزة أكتب حاجة بس مش عارفة أرتب أفكارى

أشغل مزيكا الأول عشان أركز انت مش عارف المزيكا بتعمل فيا ايه بتدخلنى فى حالة نشوة وبيحصل بينى وبينها حالة توحد بحس انها مكتوبة ليا أنا لوحدى .. كل قطعة موسيقية أو كل أغنية بسمعها بيكون فى بينى وبينها لغة مشتركة بقدر أشوف بوضوح حاجات معينة وبفتكر مواقف وبتخيل مواقف مناسبة للحالة الموسيقية اللى انا فيها
وانا المتيم فى العشق وحدى

ويجرى صوت الطنبورة أدامى ويخلينى أفتكر ليلة راس السنة واحنا راكبين التاكسى كان فى أغنية تافهه لأم كلثوم شغالة مش عارفة ليه انفعلت جدا معاها وسرحت معاك وفضلت طول الطريق أبصلك ساعتها عدى أدامى سنتين بكل تفاصيلهم من أول اليوم اللى اتشدتلك فيه لليوم اللى قلتلك فيه بحبك للأيام الحلوة والسواد اللى قضيناها سوا

أقولك حاجة وما تضحكش عليا... لما بفتكر اليوم اللى قلتلك فيه انى بحبك بفتكر أغنية حبو بعضن بتاعة فيروز ... مش عارفة ليه بس جو الأغنية دى كان نفس جو اليوم اللى قلتلك فيه انى بحبك... كنت حاسة احساس غريب ساعتها .. احساس فرحة مغيمة كده شبه الجو

هو مش حذر ولا حاجة بس أنا بحب الشتا أوى وببقى منتشية وقتها ... ساعتها كنت شامة ريحة المطرة الخفيفة والطين وبعدين بصيت بره للشارع أتفرج على آثار المطر ده وفرحت أوى انتابنى حالة فرحة غريبة عمرى ما هنساها واستنيت ردك... لقيت أغرب رد فعل شفته فى حياتى

مكنتش متوقعة انك تدى رد فعل الكسوف ده لأن على أد معرفتى بيك وقتها مكانش شكلك يدى انك هتكسف كده.... فاجئتنى جدا يومها زى ما بتفاجئنى دايما مفاجآت مش متوقعاها خالص

ياااااااااه شوف ايه اللى اشتغل

كقطرة المطر كنت وحيدا يا حبيبتى

بتفكرنى جدا بأكتر الفترات سوادا فى حياتى اللى لولا وجودك فيها كان زمانى مت من القهر...

انت عارف انى معروفة وسط أصحابى انى الصدر الحنين ليهم كلهم وعندى قدرة رهيبة انى أسمع أى حد فيهم وأتحمل كمية مشاكل رهيبة وفى نفس الوقت مش بحكى لحد.... دايما بأدى الدور ده ودايما فى وسطهم البنت العاقلة الراسية اللى بتسمع كل حد وأى حد ومفيش حد فيهم عمره قالى انه عايز يسمعنى غير قليلين أوى

رغم كل ده معاك انت ببقى طفلة صغيرة يمكن مش بحكى كتير عن اللى جوايا بس مجرد انى ابقى معاك وفى حضنك ولامسه وجودك بجد بنسى كل حاجة وكل مشكلة وبتمنى ان اللحظة اللى انا فى حضنك فيها متخلصش أبدا ... بحس ان حضنك ده عالم تانى لوحده منفصل عن الدنيا اللى احنا عايشين فيها .. بجد بقعد أسأل نفسى ان لو كل حد فى الدنيا عنده حضن يترمى فيه زى حضنك ليه هيبقى فيه مشاكل فى الدنيا؟

غريبة غريبة .. غريبة ومش غريبة

فاكر كنا بنغنى الأغنية دى امتى؟

واحنا بنجرى ورا بعض فى الشارع فى مصر القديمة وقاعدين نلعب ونضرب بعض .. اليوم ده احنا كنا عدينا مرحلة النشوة بكتيييييييير كنا عاملين زى العيال اللى هربانين من المدرسة ورايحين يعيشو سن المراهقة بتاعتهم .. يومها كنا بنجرى من غير هدف ومش عارفين احنا رايحين فين بس كل اللى عارفينه اننا مبسوطين جدا بوجودنا سوا ومش هاممنا الناس وهما بيشاورو على العيال اللى بتجرى دى وبيضحكوا ..

سنتين مش قليلين حالص ... كبرنا فيهم احنا الاتنين كتير أوى بس فى جزء فينا برضه رافض يكبر .. أنا بحب أوى احساس انى لسه صغيرة ده ومش عايزة أخسره أبدا عشان حاسه انى هستهلك روحى جدا لو خسرته .. وانت زى ما صديقة ليا بتقول طفل عبقرى وانا بموت فى الطفل ده .. هزعل اوى لو لقيت الطفل ده كبر .. يعنى بالرغم من ان ناس كتير بتتهمك بحاجات كتير وانك شرير وانك بتتعمد تضايق الناس او حاجات كتير زى دى بس بجد هما ميعرفوش ان ورا ده طفل ومش كبير كمان ده طفل صغير بس بيلعب مش أكتر

ناس كتير بتسألنى ايه خططنا لبعد كده؟

ببقى نفسى أصرخ وأقولهم اننا نفضل عيال بنلعب سوا ونجرى ورا بعض فى الشارع ونغنى سوا فى كل حى ولد عترة ولما نكبر شوية انت تغنيلى يا بنت يا ام المريلة كحلى ونشوف فيلم eternal sunshine عشان منفكرش فى يوم ان حد فينا يروح يلعب فى حتة تانية بعيد عن التانى

بجد مش عايزة أكتر من كده ... مش عايزة أكتر من انى كمان 5 سنين أجى أكتب احتفالا بمرور 7 سنين على وجودنا سوا ...

بس انت وبس

أزحف ع الأرض وع الحيطة

أوطلع وأنزل واعمل زيطة

عالمنا عالم كبير جدا فى اعتقادى انه مليان ومشغول كتير عن عالم الولاد.. عالم مليان متاهات وحواديت حتى دورو تلاقو ان ألف ليلة وليلة الراوى فيها واحدة ست (شهر زاد) طول الوقت فعل الحكى ارتبط بالأنثى مش بالذكر

كلنا بنقعد نفتكر دايما حكم وأمثال نقلا عن ستنا مش جدنا ... دلوقتى بقى تلاقو اى بيت فيه بنات لازم فاتورة التليفون تيجى كبيرة جدا وبعدين كل الولاد بيستغربو جدا اننا بنتكلم فى التليفون كتير وهما لا

احنا حواديتنا كتير وعالمنا أكبر كتير من عالمكم

فى حد هنا ممكن يعترض ويقولى لا بالعكس عالم الولاد أكبر لانهم بيشتغلو او كده

انا بقى معترضة على الكلام ده لأن بالعكس احنا معظم البنات عندنا فى مصر قاعدين فى بيوتهم مش بيشتغلو كل تسليتهم فى الحياة الكلام وبالطبع ده بيخلق عوالم كتير

ماذا سيكون احساسك عند وجودك داخل شقة بنات؟

صداااااع ... دوشة ... رغبة كل واحدة فيهم بقطع لسان الأخرى ... الهروب الى الشارع او الى السرير أملا فى الهروب من الدوشة

والأهم فى ده كله المتعة

بطبيعة تواجدى فى شقة بنات الوقت الأغلب من السنة تقريبا كلنا بنتكلم اننا بنتضرر من الصداع والدوشة وكده بس الأكيد ان كلنا متفقين على المتعة

كل المطلوب جلوس أكبر عدد من البنات سوا وشوية شاى وتسالى أو لبان وكلام للصبح

مفيش أحلى من مجموعة بنات مختلفين عن بعض فى كل حاجة وكل واحدة ليها عالمها الخاص وقاعدين بيتكلمو على موضوع معين ... ممكن نكون بنعمل ده عشان ندور على موضوع واحد أو فكرة واحدة كلنا نبقى متفقين عليها

بندور على نقطة تجمعنا سوا وتفصلنا عن الدوشة وعن الأنانية فى التعامل

لكن ايه المواضيع اللى ممكن البنات تتكلم فيها؟

الحرية؟ السياسة؟ المزيكا؟ السينما؟

طبعا بنتكلم فى ده بس غالبا بيبقى فى إطار التهريج أو الكلام السطحى جدا اللى برضه بيتقلب تهريج فى الآخر

يعنى مثال لما بنتكلم على المزيكا فبيكون موضوع الحلقة هو حماقى مثلا وفى الآخر الموضوع بيتقلب ان حماقى صوته خولاتى جدا وحالق شعر صدره

المواضيع بقى اللى أخده وقت البنات كله هى كل المتعلقة بالنميمة والرجالة والجنس وأكثرهم سرقة للوقت تحديدا هو الجنس

انا ابقى سحلية وسيمة

ويجينى برص بتاع سيما

وبتاع مزيكا وترلملم

يا سلام على قعدات قبل النوم اللى بتستمر 5 ساعات وبنضيع محاضراتنا علشانها نميمة بس ايه

فى قعدة من قعدات النميمة دى اكتشفت ان فى رفيقة ليا فى السكن متعرفش مبيض يعنى ايه!!!!

أ: أنا تعبانة جدا وعندى البريود

يــ: الله يخرب بيت الرجالة اشمعنا يعنى هما مش بيحصلهم كده يعنى احنا كل شهر وتعب ووجع دماغ وهما مرتاحين وخلاص

وينساق الحوار فى هذا الإطار لحد ما واحدة تطلع برأى مخالف تماما

غ: على فكرة يا جماعة الرجالة بيتعبو زينا زيهم من 5 ل 6 ايام فى الشهر برضه

وتبدأ فى سرد رأيها والاتيان بأدلة عليه

يعنى مثلا وانتى قاعدة مع واحد تقدرى تسألى نفسك ليه هو بيبقى قاعد مش على بعضه وبيتحرك كتير؟

سألتها بكل صفو نية فى الدنيا: انتى تعرفى الحمل بيحصل ازاى ولا؟

اه طبعا بين الراجل والست ....

نبدأ معها فى شرح كيفية حدوث دورة الحيض فنكتشف انها أصلا متعرفش يعنى ايه مبيض

ولا احط قزاز ولا اقفل شيش

عقلى يا هزاز كلك نغاشيش

• 9 comments

والله حاجة تكسف

2006 Oct 26

زرقاء اليمامة

• أنا والشعب
• أنا وعاداتنا

تخيل انت صحيت من النوم الصبح وبتمارس حياتك الطبيعية عادى وبتفتح ميلك ومن المفترض إانك مستنى ميل من نصفك التانى

فعلا بتدخل تلاقى ميل من حبيبك وميلات من ناس تانية أكيد أول متبتدى هتصطبح بميل حبيبك تقراه وتتبسط ويبقى يوم حلو وبعد كده تقلب فى ميلات الناس التانية اللى ممكن تكون مهمة بس مش هتكون بأهمية حبيبك.

تفتح ميلات الناس التانية فى الآخر تلاقى كلام غريب مكتوب وفى لينكات غريبة الكلام بيشدك بس بتفتكره هزار بتدخل على اللينكات بتلاقى صور بتفتكر إن الثورة قامت

فالدموع بتخرج من عنيك وتفرح ان أخيرا الدنيا هتبقى بمبى والناس أخيرا فاقت وخلاص هتبتدى حياة جديدة .. بس غصب عنك عنيك هتجرى على الكلام والتعليقات المكتوبة تحت الصور هتفتكر ان يا إما الكاتب بيضحك عليك يا إما ناقل ده من رواية وعامل الصور دى بأى حاجة أو ده مثلا مشهد من فيلم

تدخل هنا تلاقى حاجات غريبة جدا

هى ثورة فعلا بس مش ثورة على النظام ولا على الفساد ولا على أى حاجة من دى دى ثورة هياج جنسى

مئات الشباب أدام سينما ميامى واقفين عشان يصطادو أى بنت عشان زى ما قالو (هيييييييه هنيييييييييييييييييييك)مش فارقة بقى محجية من معبئة من متأسدلة من سايبه شعرها أهو كله جسم فيه كل الأعضاء اللى ممكن تريحه وتخليه كويس ومبسوط وخصوصا ان ده أول يوم العيد وزى ما انتو عارفين رمضان شهر ناشف مفيهوش حاجات من دى فهما يا عينى مكبوتين

والنبى الجماعة الإسلاميين اللى من أنصار الحجاب بس ييجو يشوفو الكلام ده أهو وقت الجد مفرقوش خالص حتى اللى لابسين عبايات اتقطعت

أنا مش عارفة أقول ايه ومش عارفة مين السبب

يعنى الواحد لو مكان البنات دول كان ممكن يجراله ايه وكم الدمار النفسى والرعب اللى هما اتعرضوله

السبب مين بجد؟

مهو محدش يقول ان الانحلال وغياب الأخلاق وان البنات مش بيلتزمو بتعاليم الدين والكلام الأهبل ده لان خلاص الحادثة دى أثبتت ان لو البنات عملو ايه فى نفسهم مش هيسلمو

السبب الكبت مثلا اللى هما فيه بقالهم كتييييييييير خلاهم زى الحيوانات مش شايفين غير نفسهم وخلاص ومش شايفين من الست غير جسمها حتى لو التزمنت بكلامهم وعملت زى مهما عايزين ودارته سواء بالخمار ولا العباية ولا الإسدال وكرهت جسمها واعتبرته حاجة عيب لازم تتخبى

مش كفاية عليهم كرهوا الستات فى جسمهم وبقت تداريه بكل الطرق الممكنة عشان أل ايه متفتنش الرجالة

أهو أدامكم أهو الرجالة هايجين لوحدهم

واضح اننا لازم نفكر جديا ومش بهزار المرة دى فى عملية اخصاء الرجالة بس فى وسط الزحمة دى فاهمة انه كان هيبقى صعب

بس زى ما الأمن بيستخدم أسلحة ضد الناس فى المظاهرات البنات كمان يستخدمو أسلخة فى الحاجات اللى زى دى يعنى مثلا إبرة تريكوأو مطوة اللى تحبوه

ومحدش ييجى يقولى برضه ده عنف وهمجية وده زى حد السارق فى الإسلام ومش عارف ايه

مهو مدام مفيش قانون يحمى ده وحصل حالات اغتصاب جماعى فى وسط القاهرة أول يوم العيد أدام عنين الأمن والأمن متحركش وعمل اللى بيعمله فى المظاهرات يبقى لخاص البنات تاخد حقها بإيديها

ويلعن دى بلد

• 16 comments

1234next ›last »

tags in أنا و الحاجات

أنا أنا والتهييس أنا والشعب أنا والفن أنا وانت أنا وعاداتنا أنا وهو Uncategorized

more tags

User login

Username: *

Password: *

• Create new account
• Request new password

Navigation

• Recent posts

Subscribe to this feed ...